“प्रकृति र मेरी मायालु”

– Kamal Shrestha
It’s a poem entitled “Nature and My Beloved” in Nepali Language. You will get literal translation from Google Translate. Hope you will get the taste of it. Thanks.

बिहानीको चिसो–चिसो ठन्डी पवनमा
मुस्कुराइरहेकी लजालु, निश्चल ती प्रकृती,
नङ्सिरी लागेर कठ्याङ्ग्रिए झैं,
अनायसै खुम्चिएका मानसपटलका स्मृति ।

अँध्यारो छिचोल्दै उत्प्रेरित किरणसँगै
पग्लन्छन् हिमालयमा हिऊका लोप्पाहरु,
रुखका पातहरुमा, शितका ढिक्का–ढिक्काहरु
स्फूर्तिले उमंगिन्छन्, हरियाली वनपाखा र डाँडाकाँडाहरु ।

सुनौलो प्रभातको सुरुवातसँगै सुमधुर आवाजमा
छङ्छङ् गर्छ खोला, कुना कोप्चा–कोप्चामा
एउटा रुखको छहारीमुनी, मेरी मायालु
पलपल, पर्खिरहेकी होलिन्, न्यानो मायाले ढाक्न ।

यो गजबको प्रकृतिका कुना–कुनामा,
तिम्रो सुवास अनि कोमल नयनतामा,
मेरो मुटु ढुक–ढुक गरिरहेछ,
दृश्य–दृश्यमा तिम्रो स्वरुप छमछमी नाचिरहेछ ।

स्वप्न सँधै मिठो हुन्छ भन्न सकिन्न,
एउटा बुढो रुख फेरी तन्नेरी कहिल्यै हुँदैन,
प्रकृति र तिमी एकसाथ एउटै रंगमा
आज भेट्नु छ, यस्तो दिन कहिल्यै आउँदैन ।